«Nomes e voces» é un ambicioso proxecto de investigación que nace do convenio que as tres universidades galegas e a Consellería de Cultura asinaron fai tres anos, coincidindo co Ano dá Memoria 2006. O proxecto, dirixido polo catedrático de Historia Contemporánea da Universidade de Santiago, Lourenzo Fernández Prieto, conta tamén co traballo coordinador dos profesores Emilio Grandío, María Jesús Souto, Julio Prada, Xosé M. Núñez Seixas e Xurxo Pantaleón, ademais do historiador especialista no movemento obreiro galego Dionisio Pereira.

O traballo de investigación vira ao redor de tres eixos fundamentais: pór ao servizo da sociedade galega os nomes de todolos represaliados, recoller as voces dos encarcerados, exiliados e sobreviventes a través de entrevistas e fontes orais e sacar á luz os lugares onde as vítimas foron torturadas, vexadas e asasinadas.

Esta base de datos, unha das máis completas de todo o Estado, significa a consecución da primeira fase do proxecto. Está presentada en forma de páxina web e ofrece os nomes e datos persoais das vítimas, ademais do tipo de represalia vivida por cada unha: prisión, execución, paseo, exilio ou proceso.

Lourenzo Fernández Prieto destacou que para a elaboración do censo de vítimas valéronse de diferentes tipos de fontes, primando as orais a través de encontros con protagonistas. «Fixéronse preto de 500 entrevistas entre Galiza, Cuba, Costa Rica, Arxentina, Uruguai, Madrid, Cataluña e Euskadi», dixo. O director do proxecto asegurou que un dos próximos obxectivos é engadir «arquivos de imaxe e audio» á base de datos, para facer públicas as entrevistas, fotos, cartas e demais material «solicitado nestes tres anos de intenso traballo».